Jólasveina haiku :: Skyrgámur

  Skyrgámur brýtur
  upp sáinn - í sig hámar
  rumurinn skyrið

Jólasveina haiku :: Hurðaskellir

Hurðaskellir hátt
lætur þegar fólkið vill
fá sér dúr og hvíld

Jólasveina haiku :: Askasleikir

  Haus Askasleikis
  undan rúmi ljótur skýst
  askana hreinsar

 

 

 

 

 

 

Mynd fundin á Vísíndavefnum.

Jólasveina haiku :: Pottaskefill

Pottaskefill ber
að dyrum og stelur pott
- skefur hann hreinan

 

 

 

 

 

Vísindavefurinn á þessa mynd.

Jólasveina haiku :: Þvörusleikir

  Þvörusleikir mjór
  frelsaði pottasleifar
  eldabuskum frá

 

 

 

 

 

Ég rakst á þessa mynd hjá Þjóðminjasafninu.

Jólasveina haiku :: Stúfur

Stúfur hét stubbur
sem pönnur gjarnan hirti
og innúr þeim skóf

 

 

 

 

 

Myndin er að venju tekin af vef Þjóðminjasafnsins (sem veit ekkert af því).

Jólasveina haiku :: Giljagaur

  Giljagaur í fjós
  með gráan hausinn sótti
  mjólkurfroðu stal

 

 

 

 

 

 

Mynd stolið (í þetta sinn) af vef Þjóðminjasafnsins.

Jólasveina haiku :: Stekkjastaur

Fyrir nokkrum árum samdi ég jólasveina haiku í tilefni þess að jólasveinarnir fóru að týnast til byggða. Þetta er sú fyrsta enda kom sá fyrsti í morgun. Njótið vel. 

Hann Stekkjastaur vill
ærnar stirðfættur sjúga
það gengur ei vel

 

 

Ljósmyndin er fengin að láni frá vef Þjóðminjasafnsins.

gamalt súkkulaði = súkkulaði gamalt?

Ég vil ekki gamalt súkkulaði en mér finnst sniðugt að súkkulaði sé eldra en áður var talið. Hins vegar er verið að tala um kakaó plöntuna og drykki unna úr henni en ekki súkkulaði eins og við þekkjum það. Hvað þá að fundist hafi nokkur gömul súkkulaði stykki.

Gamalt súkkulaði

Ljóðaskrif á íslensku og ensku

Ég hef verið undanfarið að dunda mér við að skrifa haiku og önnur ljóð nær eingöngu á ensku. Það opnaðist fyrir mér heimur ljóðaunnenda á netinu og ég gekk inn í samfélag þar sem heitir pathetic.org.

Fyrst skrifaði ég eingöngu haiku en hef hent inn öðrum ljóðum svona inn á milli eftir því sem skáldskapargyðjan hefur blásið mér í brjóst.

Haiku er ævafornt japanskt ljóðform, 3 línur að lengd og reynir að fanga andartakið. Haiku vísar alltaf til einhverrar af árstíðunum fjórum. Haiku er 5/7/5, það er að segja að fyrsta og þriðja línan eru 5 "on" að lengd en önnur lína 7.  Yfirleitt er einnig einskonar hik eða "brake" í haiku og þá í enda fyrstu eða annarar línu.

Ef viðfangsefnið er mannlegur breyskleiki og gamansemi þá kallast ljóðformið senryu en er að öðru leyti eins nema hvað það vantar árstíðartilvísunina og hikið.´

Einnig er til tanka (sem er fimm lína ljóð, 5/7/5/7/7, sem ég hef reynt örlítið við.

Ég hef verið hreinlínumaður í haiku skrifum, aðhyllst gamla skólann sem segir að japanska "on" sem ræður lengd línanna samsvari vesturlensku atkvæði. Það er ekki hægt að leggja "on" að jöfnu við atkvæði þannig að nýrri stefna í vesturlenskri haiku hefur verið að hafa haiku þrjár línur að lengd og ekki hafa meira en 17 atkvæði í ljóðinu sjálfu en skipting atkvæðanna sé orðin frjálsari.

Ég hef rétt verið að prófa þessa nýju haiku stefnu á ensku og líkar vel. Mig hefur lengi langað að gera veg haiku hærri á Íslandi en einhverra hluta vegna spreyta fá skáld sig á því ljóðformi. Ef einhver hefur áhuga á að vita meira um haiku, senryu eða tanka þá er þeim sama velkomið að hafa samband.

Ég bloggaði á haiku-formi í u.þ.b. ár og hér má sjá afraksturinn. Þeir sem nenna að lesa sig í gegn um þetta fá punkt hjá mér.